Kami Kabange yatangiye imyitozo muri REG BBC, yazamuye ikizere cy’igikombe

Amakipe mashya muri shampiyona y’u Rwanda ya Basketball akomeje kwitwara neza. Imwe muri yo ni REG BBC ifite abakinnyi benshi bakomeye. Hiyongereyeho Kami Kabange bavanye muri City Oilers yo muri Uganda.

Kami Kabangu wa kabiri ibumoso ari kumwe n'abatoza b'ikipe nshya

Ikigo cy’igihugu gishinzwe ingufu REG cyashinze ikipe ya Basketbal itangirana n’uyu mwaka w’imikino. Mu kwiyubaka yasinyishije abakinnyi benshi bakomeye, n’umutoza John Bahufite wavuye muri Espoir BBC.

Iyi kipe ubu iri ku mwanya wa gatatu muri shampiyona inyuma ya APR BBC na Espoir BBC, yamaze gusinyisha umukinnyi mpuzamahanga Kami Kabange Milambwe ukomoka muri DR Congo ariko ukinira ikipe y’igihugu y’u Rwanda.

Kami watangiye imyitozo muri REG BBC kuri uyu wa mbere ni inkingi y’ikizere cyo kwegukana igikombe nkuko John Bahufite umutoza yabibwiye Umuseke.

Bahufite yagize ati: “Yamaze gutangirana imyitozo na bagenzi be. Yatinze kuhagera kuko yari akiri mu mikino mpuzamahanga na City Oilers yakiniraga. Ubu tugize aba ‘pivot’ babiri bafite ibigango; Kami na Ngandu (Bienvenue). Kuza kwe byazamuye ikizere cy’igikombe. Ubu hejuru ya 65% ndakizeye.

Uyu mutoza yakomeje avuga ko Kami Kabange ari mu bakinnyi bake muri Afurika bafite ubushobozi bwo kugarira no gusatira kandi byombi akabikora neza, ibintu arusha abandi bakinnyi bose bakina mu Rwanda.

Kami w’imyaka 32 yagarutse mu Rwanda nyuma y’imyaka itatu yari amaze muri Uganda akinira Kambala City Oilers Basketball Club yagiyemo muri 2013.

Benjamin Mukengerwa (hagati) ari kumwe n'aba pivot babiri ba REG BBC, Kami Kabange, Ngandu Bienvenue

Intego y'abasore ba REG BBC ni igikombe cya shampiyona

 

 

Source: Umuseke




Leave a Reply

Your email address will not be published. Required fields are marked *